政情：方文雄無懼勞工議題殺埋身
勞資雙方去年為釐定最低工資水平爆發嘅「攻防戰」，相信大家都記憶猶新，勞工界下一個戰場係標準工時及男士侍產假立法，普遍商界都金睛火眼。不過，協成行董事總經理方文雄（David）就似乎無懼各項勞工議題殺到埋身，事前亦做足準備工作，原來佢公司已經有九成同事返緊「朝九晚六」，唔鼓勵超時工作，希望藉此鼓勵同事喺返工時間認真工作。
據聞David冇老細架子，佢會等晒啲同事走晒，自己留低再做埋啲手尾先至走，認真唔話得。至於男士侍產假，David認為要立法推行都影響不大，因為男士侍產假只係幾日啫。講開又講，早前見David仲用緊一部白色嘅舊款手機，原來佢從來唔會用電話上網，只係作通話之用，佢解釋，因為平日喺公司同屋企都有電腦上網，另外出街配備一部平板電腦，難怪佢唔使做「低頭族」。