南區區議員司馬文因為不獲公民黨（公文袋）支持參選立法會超級區議會議席，搞到憤而退黨，最慘係最後都攞唔夠十五個提名參選。盛傳同公文袋大搞密室政治嘅民主黨（白鴿黨）何俊仁（鐵頭仁）尋日就喺電台節目上話，聲稱該黨嘅區議員其實好願意畀提名司馬文嘅，之不過司馬文冇搵佢哋幫手喎。白鴿黨同公文袋搞「地下情」阻人參選，依家鐵頭仁仲喺度講風涼話，抵佢畀聽眾連環鬧爆。
鐵頭仁被幾個聽眾鬧爆兼要佢下台，批評白鴿黨前年搞政改方案搞咗個超級議席出來，但門檻又定得太高，先至搞到司馬文選唔到。又有聽眾大鬧白鴿黨，話佢哋有份通過政改方案令立法會嘅否決權要由廿席加到廿四席，直斥「如果泛民今次選舉失利，攞唔到廿四席，你同劉慧卿係咪會引咎下台？」點知鐵頭仁話唔關佢事，仲邀功話佢哋爭取多五席地區直選。衰嘅唔認，功就攬上身，呢啲咪叫無恥囉！