新政府上任一個月以來，先後爆出高官寓所僭建、發展局前局長麥齊光被捕兼辭職、國民教育爭議、以及最新嘅新任發展局局長陳茂波嘅太太持有劏房單位風波，次次都要政務司司長林鄭月娥出嚟撲火。林鄭尋日總結以上事件時就強調，市民對官員有高要求係合理嘅，但亦希望大家畀啲時間同空間新政府做實事。特首梁振英今日會喺禮賓府答謝喺颱風期間緊守崗位嘅政府人員，睇怕林鄭都應該有份啩？
