政情：嫻姐救蚯蚓 喝窒葉偉明
特首梁振英（CY）一向支持善用廚餘，上司叫到，環境局局長黃錦星自然全面配合，相信環境局唔使幾耐就會推出相關政策。
參選立法會超級區議會議席嘅工聯會陳婉嫻就食住條水，尋日搞咗個同廚餘有關嘅活動，拉埋新界東參選人葉偉明入上水用廚餘轉化成嘅肥料耕田。
嫻姐同葉偉明耕田，睇落好似有板有眼，嫻姐話呢種方法種出嚟嘅蔬菜好有益，對於好似佢呢類癌症康復者相當唔錯；佢又話，選舉後會邀請CY一齊耕種，亦希望佢發展呢項產業，增加就業機會喎。
嫻姐喺烈日之下都玩到忘形，同事於是不斷叫佢抖抖，點知佢係都要耕埋先肯走。
話說兩人翻土期間，葉偉明差啲挖中條蚯蚓，嫻姐即時喝止，話蚯蚓可以翻鬆泥土，嚇到葉郁都唔敢郁，認真搞笑。參選超級議席名單仲有何俊仁、涂謹申、劉江華、李慧琼、白韻琹。