中環出更：詹氏姊妹 食得夠尖
入夜後嘅尖沙咀，愈夜愈美麗，卓妮有日行過遊人如鯽嘅廣東道，巧遇「香港手套大王」詹氏第二代詹嘉莉（Kelly）及大妹嘉儀、二妹嘉雯，原來佢哋同星級化妝師Rick Chin合作嘅美容王國已進軍尖沙咀，全新嘅「美學肌研」美容中心啱啱喺海港城開幕。當日三姊妹忙足成日，特登約埋好友到北京道一號嘅Aqua餐廳輕鬆吓。
Aqua餐廳係跨國性飲食集團旗下食肆，曾被評為全球七大最佳夜景餐廳之一，名氣響噹噹。Kelly都被餐廳嘅靚絕景色迷倒，已幫襯好多年。
最佳夜景餐廳歎極品
除咗靚景之外，Aqua嘅意日風情美食亦係一流，當晚三姊妹叫咗鮮甜唔膩嘅龍蝦薄餅、擺設華麗豐盛嘅魚生拼盤，其中灑上金箔嘅「日本A5雪花和牛卷」備受激讚，食到眾人舔舔脷。
詹氏姊妹唔止將父輩打造嘅江山發揚光大，仲闖出另一片天地，包括成立Richmont首飾公司，為多個世界名牌生產精緻首飾，又拍住Rick勇闖美容業，創業魄力不可小覷。