中環出更：鄭錦鐘坐郵輪 睇冰川消暑
呢幾日熱到郁吓都全身濕晒，真係想去冰天雪地轉個圈。卓妮正幻想緊去邊度好時，咁啱遇到保良局副主席鄭錦鐘（Eric），原來佢啱啱放完「寒假」返嚟，既睇冰川，又食皇帝蟹，真係聽落都涼浸浸呀！
十層樓高墜落 蔚為奇觀
每年暑假都係一家大細出門遠遊嘅好時候，Eric就搞咗個鄭氏兄弟睇冰團，同太太、兩個妹妹及細佬四家人一齊坐豪華郵輪去阿拉斯加歎世界。已經好耐無放過長假嘅Eric，今次一放就十三日，享受一個無憂無慮嘅旅程，身心都輕鬆晒。今次旅行嘅重點節目就係去睇冰川，由於一年間只有五月至九月可以同冰川作近距離接觸，所以機會難得，而且冰川只係隔半個足球場咁遠，睇住十層樓高嘅冰川瞬間墜落，蔚為奇觀，令人驚嘆大自然威力。
睇完咁震撼嘅自然景象，食物方面當然都要一樣震撼味蕾先叫完美，除咗品嘗鮮味到極嘅阿拉斯加皇帝蟹外，仲有一種體積較小嘅Dungeness Crab（黃金蟹），味道鮮甜無比，好味到Eric都忍唔住要搬一箱返香港做手信，嘩！一箱有廿四罐，都咪話唔重。
講開又講，Eric除咗係好爸爸外，對細佬妹都好有風範，但原來咁多年來佢都未試過同弟妹去旅行，所以今次旅程別具意義。郵輪上嘅設備齊全，照顧晒各人需要，鄭太就鍾情每日黃昏，服務員開床嘅時候，會好有心機咁用毛巾摺出可愛嘅動物，好似龍蝦、魷魚等海鮮，好有心思，仲出咗本書教授摺疊技巧，難怪Eric太太都忍唔住買咗本書，諗住返香港同孫仔一齊玩。
卓妮