中環出更：葉振南智退意國小偷
啤酒代理商葉振南（Stephen）日前舉家遠赴英國出席大女Peggy大學畢業禮，順道同愛女慶祝牛一，兼到細女Cecilia將會入讀嘅心儀學校視察情況。難得放假，Stephen一家仲去咗意大利度假，漫遊佛羅倫斯、比薩斜塔、羅馬及米蘭，點知期間遇上疑似小偷，好在被Cecilia機智發現，有驚無險。Stephen就忠告大家，歐遊時謹記要提高警覺，免招損失。
帶遊花園 四目交投
Stephen話，當日佢同母親、太太、兩位千金喺米蘭車站附近觀光之際，Cecilia忽然察覺被人跟蹤，Stephen即刻打醒十二分精神，同疑似小偷遊花園一輪後，轉身來個四目交投，小偷自知行蹤敗露，知難而退。Stephen笑謂，囡囡咁機警，唔知係咪睇得《警訊》多呢？
Stephen除咗係潮州商會會董，仲係中區少年警訊副主席，呢幾日佢就同主席林柏昌帶領一班會員到潮汕山區扶貧及捐贈圖書，並參觀公安局指揮中心及特警訓練中心，讓會員了解潮汕發展。
卓妮