政情：金刀梁自爆小學讀女校
一般女校都唔會收男學生，但香港大學校務委員會主席梁智鴻（金刀梁）就做過「女校男生」。女校瑪利諾修院學校（小學部）前日嘅畢業典禮上，就邀請咗金刀梁擔任主禮嘉賓。佢致詞時大爆自己同該校有一段淵源，原來佢小學一年班做過該校「女校男生」，不過呢段奇遇只有短短一年就結束。
話說二次世界大戰時，日軍侵華佔用瑪利諾修院學校，直至一九四六年先至重開校園。當年該校破格收咗少數男生，金刀梁就係其中之一，可惜佢讀咗一年，就舉家移居港島區，佢亦惟有轉校。
金刀梁仲讀過唔少首屈一指嘅名校，佢話由聖約瑟小學直接升讀聖約瑟書院，但讀到中五時，一心想從醫嘅佢，眼見書院冇得讀生物，於是分別報讀咗英皇書院及皇仁書院嘅預科班。無幾耐，英皇收咗佢，佢讀咗僅僅一日，又收到皇仁取錄書，最終轉到皇仁讀到預科畢業。金刀梁讀親間間都係名校，真係羨慕死現今一眾望子成龍嘅家長。