政情：政協常委準備大換血
北京統戰手法層出不窮，好似屬於香港嘅十多名全國政協常委，地位素來崇高，工商界人士又幾乎係政協常委嘅「常客」，所以歷來都係唔少政商界中人明爭暗鬥嘅戰場。人大政協將於明年換屆，而政協常委亦勢將大換班，於是有政壇高人認為，工商界過去所佔嘅政協常委比率過高，希望趁換屆增加基層同專業嘅代表，據聞北京亦正有此意，估計換屆後將有一番新氣象。
肥龍惹官非隨時被叮走
五年一屆嘅人大政協換屆，每逢換屆都令建制派內部掀起一場爭奪戰，當中又以政協常委嘅「卡位戰」最為激烈。依家屬於香港嘅有十六名政協常委，預料會出現多個空缺，包括已病逝嘅徐展堂、候任特首梁振英（CY）因為做特首而騰出空缺，而楊孫西就可能因為年齡問題要退下火線。另外，被廉政公署調查嘅前政務司司長許仕仁（肥龍）及捲入新地案嘅郭炳湘，亦未知有無得留低。
工聯會林淑儀上位大熱
政協常委地位崇高，有多個空缺自然多人爭崩頭，但有心水清嘅政壇中人話，依家十六名港區政協常委，其中有工商界背景嘅有十二人，佔整體四分之三，有人認為工商界比例長期過高，希望增加基層同專業背景嘅人，溝淡政協常委同工商界對等嘅印象。
講到基層代表，自然首推高舉親中旗幟嘅工聯會，該會較為人熟悉嘅政協委員有工聯會會長林淑儀及「票后」陳婉嫻，坊間相信嫻姐很大機會循超級區議會議席重返立法會，基於立法會議員做政協常委嘅例子較少，所以林淑儀嘅行情被看高一線。不過，亦有政圈中人提醒，不要低估廣東社團總會主席王國強嘅實力，因為佢曾出任九龍城區議會主席多年，同地區基層有深厚嘅連繫，可能係基層代表嘅人選之一。
至於專業代表方面，CY七一上任特首後，如無意外會辭去政協常委專心做好本身工作，但要搵同CY差唔多資歷嘅專業人士補上並不容易，至今尚未傳出合適人選，但隨着換屆日子愈近，預料會有更多人現身爭奪。