孤寒告別派對 賓客食唔飽
審計報告揭發曾蔭權濫用公帑喪住頂級酒店頂級套房，但有知情者踢爆「貪曾」原來對己疏爽，對別人卻異常孤寒，包括選擇在禮賓府搞告別派對，疑諗縮數慳場租酒席；席上食物少、質素差，令不少賓客食唔飽；最後更濫用以公職身份收到的慶回歸紀念品，將之作為派對抽獎禮物，令中獎者哭笑不得。
知情者透露，「貪曾」最近雖受到連串貪腐醜聞困擾，但仍有心情在禮賓府大排筵席搞告別派對，惟派對席上的食物質素差劣，而且分量甚少，不少賓客都大呻食唔飽，事後要再自掏腰包食消夜補飛。
抽獎禮物：慶回歸紀念品
最離譜的是，派對設有抽獎環節，但不少禮物根本是「貪曾」不想從禮賓府搬走的剩餘物資。其中一件「大禮」是一座慶回歸金龍，動輒有十五年歷史；不過該條「金龍」並非真金或者鍍金，而是由硬膠製成，令到抽中該條「硬膠龍」的賓客不知好嬲定好笑。
本報記者