「安貧樂道」講就易，大家從貪曾身上都睇到高薪都養唔到廉，應該體會到貪腐喺官場所以禁之不絕，而黨紀國法、防止賄賂條例，很多時形式多於一切！司馬遷在《史記‧貨殖列傳》可謂洞悉人性：天下熙熙，皆為利來；天下攘攘，皆為利往。貪曾為利亦不顧禮義廉矣！
老朽之所以有此感慨，皆因澳門之巨貪案，除香港富商牽連其中，最諷刺的是，由本港揭發，但貪曾就順手咁轉交澳門廉署辦理，太極推手真係咁好用？這難免令人浮想翩翩，難道貪曾想臭屎密冚？事實係佢未離開馬桶已臭不可聞。
老朽但知，有啲嘢一牽涉其中，就唔係用水可輕易洗得甩。有個關於語文的趣話，說兩縣相鄰，甲縣蝗災嚴重，乙縣卻連一隻蝗蟲都沒有。明眼人當知乙縣的地方官欺上瞞下，被上頭查了出來，卻向甲縣發出一公文：「敝縣原本無蝗災，均從貴縣飛過來。請你趕快搜捕盡，免得再把我縣害。」
甲縣縣令打開公文一看，知是耍賴之詞，不甘示弱，在該文後也以打油詩回敬：「蝗蟲本是天之災，並非本縣無德才。既從敝縣飛過去，還請貴縣押回來！」呢則語文趣談確實應景，貪曾被本報獨家猛料揭發：今年二月在濠江出席富商賭場春茗活動。
如今北京發功，港澳清洗太平地，貪曾唔顧身份，黐飲黐食，與富豪上天入海，又私人飛機又私人遊艇，今趟能逍遙法外，高唱「質本潔來還潔去」吹着口哨輝煌下台嗎？