探女之行共八日，葉太抵埗後，Cynthia開心到飛起，不停介紹同學畀媽咪識，葉太一口氣出席兩場畢業禮，親自舉機為囡囡拍照，當目睹女兒與同學進場一刻，平日硬朗嘅葉太都忍唔住流眼淚。佢慨嘆近年忙於立法會工作，囡囡留學四年間，只係探過佢一次，難得女兒好生性。
儀式完結後，由於人潮湧湧，兩人只喺大學餐廳食漢堡包，飲香檳慶祝，之後匆匆趕回囡囡宿舍丟棄舊家具、舊衣物，仲撞啱落大雨，相當狼狽。Cynthia帶咗五箱行李返香港，當中包括書本、畢業袍及畢業證書等。葉太又專登陪囡囡去大學書店買相架，將畢業證書裱起，原來個相架上印有校徽，好有紀念價值喎。