中環出更：利子厚娶外蒙妻「土」製婚禮
唔少人都揀龍年結婚，利希慎家族後人、馬會大董利子厚（Michael）都宣布脫離「鑽石王老五」行列，與拍拖近三年嘅三十歲外蒙古女友Munkhzul Odkhuu拉埋天窗。尋日卓妮喺沙田馬場見到Michael，佢親口確認婚事，話下月九日喺香港大宴親朋後，十日即飛土耳其伊斯坦堡舉行簡單而隆重嘅婚禮。佢盛讚準未婚妻係「一個好好人嘅人，有智慧、好心地」，又讚對方體貼同顧家，說時一臉幸福。
打算生B 數量不限
Michael話選擇土耳其做婚禮地點，皆因該處風景靚兼歷史底蘊豐富，而且係佢同女友嘅拍拖勝地。佢透露到時會邀請少數親友隨行，婚禮以簡單為主，至於花費幾多錢，Michael就笑稱唔方便講。現年五十一歲嘅佢話有打算生B，不過就唔限幾多個，總之另一半話點就點，認真體貼。
講到求婚經過，Michael大爆一take過搞掂，話說某晚佢同女友撐枱腳時送上婚戒，女方驚喜之餘亦好感動。Michael話，佢同蒙古女友平時以英語溝通，不過外父外母唔識英文，佢都落力學番幾句簡易蒙古話，其他嘢就要靠女友做翻譯喇！佢仲話，婚後太太會來港定居，但佢工作繁忙，度蜜月會押後至暑假。
尋日仲有行政會議召集人夏佳理隻愛駒「赤膽」以及立法會議員劉皇發公子劉業強與太太嘅靚駒「驌龍」分別奪冠，發叔一家大細出動拉頭馬，夏佳理就未有現身，夏太夏安麗話，老公忙緊公事趕唔切入場，但佢肯定老公會喺電視機前，好肉緊咁幫愛駒打氣喎，兩夫妻果然心靈相通。
卓妮