【本報訊】不少市民都曾試過為貪一時之便，隨處丟棄垃圾、煙頭甚至隨地吐痰，「博」不被執法人員發現，有人即使「斷正」也會為「慳番千五蚊」而無所不用其極，根據今次外洩的近百份「定額罰款通知書的資料輸入表格」，垃圾蟲最常以「畀次機會」同「我唔知係犯法」求情，此外亦有人以「我都唔係隨處揼，我仲揀坑渠先揼」、「喉嚨有痰，唔吐咗佢，唔通吞落肚咩」為求情理由。
求情不果，不少人竟不「認命」甚至耍賴，有人不肯交出身份證，竟着食環署人員「你自己問入境處囉」，直至遭食環署人員警告，如果無合理辯解而不提供個人資料亦屬違法，才無奈「就範」。
耍賴不成，有人便以言語發洩以熄心中怒火，曾有被罰款市民「還擊」質問食環署人員，「你係咪一路跟住我呀？你跟咗我幾條街，你做乜咁勤力呀」、「你吊住我尾，畀你陰到我，你好嘢，你累我唔見千五蚊，不過你都要小心呀！」甚或發晦氣「今日真係見鬼，仲慘過借貴利！」
亦有少數人認為堅持對食環署人員置諸不理才夠「霸氣」。文件所述，去年七月一名女子因隨處吐了一粒荔枝核被票控，竟就直指被屈，拒絕合作及大聲理論不理口頭警告，引致幾十人圍觀，最終更勞動警察出場才可收科。