中環出更：港島婦聯會砌餅入健力士
尋日母親節，港島婦女聯合會創下一項健力士世界紀錄。主席張雅麗（Carol）巾幗不讓鬚眉，與餅店Christina's Creation老闆陳妙蘭及城中名人，齊以一萬零八十個Cup Cake，砌出一幅九點一米長、六點四米闊嘅「愛心圖案」。
世紀創舉尋日晏晝喺灣仔修頓室內運動場進行，數百名市民見證歷史時刻，Carol帶埋六歲囝囝晉熙一早到場打點，夾手夾腳砌餅，相當合拍。陳妙蘭亦拉埋前東華總理老公文肇偉、大仔Brandon及次子Alastair做啦啦隊。
車隊甩底 有驚無險
一次過整萬多個Cup Cake，籌備工夫長達個多月，陳妙蘭坦言日前因為太辛苦，胃痛又感冒。活動開始之前，幫手送餅去會場嘅車隊突然甩底，激到陳妙蘭紮紮跳，幸好有家姐、細妹齊齊出動，搵嚟臨時車隊幫手，最後有驚無險。
數大義工，唔少得灣仔中西區工商業聯合會主席李鋈麟，佢以個會名義，捐出三十萬元支持創舉。講到慶祝母親節，佢慨嘆慈母已去世，會將愛心孝敬年邁父親，晚上舉家去酒樓食飯享天倫。
卓妮