政情：莫乃光怕種票 多過IT豪
立法會資訊科技功能界別議員譚偉豪（IT豪），前日話唔擔心面對老對手、公共專業聯盟主席莫乃光（Charles）嚟緊九月立法會選舉挑戰佢，反而擔心「電訊魔童」王維基出嚟選，Charles尋日反擊，話睇死建制派一定唔會有兩個人爭，佢反而擔心種票，同埋畀偽獨立人士鎅票。
親建制嘅資訊科技組織iProA去年被揭發疑似種票，不過事後好似冇咗下文咁，Charles透露政府原來去年十二月已處理咗件事，由於太兒戲，佢誓言會再向政府部門跟進，因為無理由明知有問題，政府都唔主動調查，要人投訴先做嘢喎。
批選民資格複雜添混亂
Charles又話，資訊科技界選民資格複雜，好似香港資訊科技聯會嘅會員咁，成員一定要係今年選民登記前一年已經係會員先可以喺立法會選舉投票，而且投票當日仲必須仍然係有關專業團體嘅正式成員先得，佢擔心咁混亂，會影響選民投票意欲咁話。