政情：林D9唔撈 貪曾反應慢幾拍
真係面就人哋畀，架就自己丟。得番個多月任期嘅煲呔曾，之前仲口口聲聲話七一之前係佢話事，但觀乎立法會審議議員出缺安排陷於無日無之嘅拉布戰、會議不足法定人數搞到流會，以至特區第二把交椅、政務司司長林瑞麟講明七一後唔撈，煲呔曾一直遲遲未有回應，到尋日趁住開行政會議先至悻悻然出嚟講幾句，唔知佢開口嗑着脷定係鬼拍後尾枕，講幾句嘢都講到錯漏百出。
重要法案滯後仍龜縮
上星期四立法會流會後，多項重要法案，諸如網民鬧爆嘅《版權條例》、規管一手樓銷售、競爭法同埋重組政府架構等棘手議題，統統前景極不明朗。做事快狠準嘅候任特首梁振英喺流會翌日立即開腔表示關注，急市民所急，不過現任特首曾蔭權爵士呢？似乎仲匿咗喺個殼度未伸個頭出嚟，枉佢上月中去完外訪、享受完總統套房返港之後，一落機就大大聲話七一之前佢話事。
唔單止流會，連煲呔曾麾下嘅林D9，喺星期日上電台剖白「知所進退」，七一後去英國讀神學，身為上司嘅煲呔曾一句嘢都無講過。話晒呢幾年嚟林D9單係政改一役，已經幫煲呔曾擋過唔少明刀暗箭，就連煲呔曾被爆貪盡海陸空，林D9依然不離不棄，依家林D9要走，煲呔曾乜都唔講，可見佢份人真係信唔過。
到咗尋日，睇嚟幾個月無染髮嘅煲呔曾喺臨開行會前一刻，先至突然出嚟死撐自己會「保持戰鬥力」，「緊守崗位至最後一刻」，同埋行貨式讚林D9「無畏艱巨，不屈不撓，係不折不扣嘅出色公職人」，林D9聽到定必點滴在心頭。煲呔曾繼而暗批拉布唔啱，指人民力量議員對出缺安排有不滿，應該以投票呢種遵從「大眾服從小眾」精神嘅方法解決，好明顯，煲呔曾將「小眾服從大眾」講錯咗啦，不過可能佢係特登嘅，因為佢素來被視為泛民無間道，話唔定佢暗啞抵認同拉布係啱呢，因為咁咪可以拖住重組政府架構囉，損人不利己，小朋友千祈唔好學吖！
話時話，佢暗撐拉布都係有理由嘅，立法會主席曾鈺成已經批咗廿三個議員聯署嘅彈劾貪曾議案，排咗期喺下星期三提出，貪曾可能以為拉布可以令佢避過彈劾呢？