政情：黃宜弘衰爛瞓 失議席
立法會多名功能界別議員開會遲到早退，除咗被封為「大懶蟲」外，早已惹來業界微言。據聞以為「坐定粒六」等連任嘅中華總商會（中總）代表黃宜弘，最新消息話佢又被勸退，仲搵咗兩個合適人選「二揀一」。當中年紀大固然係一個勸退原因，但原來主因係成日被電視台影到佢開會瞓覺嘅醜態，睇怕佢要疊埋心水等退休。
九月立法會選舉烽煙四起，除咗地區直選爭崩頭外，多個由親中陣營把持嘅傳統功能界別都有求變聲音，特別係要踢走霸住議席多年嘅「大懶蟲」議員。有親中消息透露，立法會「大懶蟲」包括黃宜弘、金融界李國寶及體育界霍震霆嘅選情都危危乎，其中西環對部分「大懶蟲」更特別有意見。
我哋早前講過，黃宜弘為咗連任，硬銷自己做立法會帳目委員會主席有幾稱職，喺「維穩」之風盛行下成功留低。但有中總中人私下暗批佢無做好議員嘅職責，特別係見到廠商會過去幾年搞得有聲有色，尤其係林大輝屢次代表業界發聲，相反黃宜弘成日都隱形，令中總喺四大商會嘅地位同影響力比下去。
聽施政報告「瞓身」支持
有親中消息透露，黃宜弘個議席突然有暗湧，除咗多年來都無做齣好戲外，佢成日被人影到開會瞓覺都有關係。事實上，黃宜弘衰瞓覺都好多次，還記得有次佢喺老董宣讀施政報告時呼呼大睡，事後竟然死撐話對老董施政有信心喎，結果被人笑佢「瞓身」支持，成為多年來嘅笑柄。
至於外號「三點不露」嘅李國寶，據聞佢嘅選情亦危危乎，一方面中銀高層吳亮星事前張揚會強勢回歸，加上佢又捲入僭建醜聞，誠信破產如何履行議員職務呢？另有傳體育界霍震霆係咪可以留任，關鍵在於港區人大代表馬逢國會入政府定係立心做立法會議員，霍震霆要睇人面色先知自己有無得留低，認真失威。