自詡有錢有樣多女人黐
「鞋王」與前度「三奶」的爭樓訴訟，緣於傳媒揭發「三奶」李姿霆與過氣「港男」黃長發譜出姊弟戀，最終鄧劍群入稟向李追討物業。不過，鄧劍群昨於庭外卻大方表示不憎恨黃長發，反而說句多謝：「我要多謝發仔，佢係我救星、明燈，令我睇清楚件事！」鄧又大談自己多年間如何周旋於妻子與女友之道，並公開自己年近七旬仍能保持青春的養生之道。
鄧劍群及李姿霆昨日均如常到庭，昨日天氣明顯較前日清涼得多，但李姿霆卻收起前日的恤衫配長西褲的行政裝扮，反而穿上短裙大騷美腿，上身更配上透視裝，一身性感氣息把涼意也驅散，她亦收起戴在左手估計達四五卡的閃爍鑽戒。鄧劍群則依然西裝筆挺到庭，他進出法庭不忘流露風趣幽默，見記者拍照，便叫記者影「靚仔啲」。
返屋企瞓 妻無詐型
鄧在庭外更大方談論自己周旋眾多女伴之間的本領，他斬釘截鐵說：「係佢哋自己話自己係二奶三奶，我覺得只係女朋友，不時會食吓飯咁……。」但他堅持每天均「返屋企瞓」，妻子亦從無「詐型」。他形容與妻子關係是「生死之交」：「我幫佢擋一刀，佢幫我擋一刀」。至於有多名女友在身邊是否感陶醉時，他只笑稱「命中注定，劫數難逃」，又指現已沒有與女友見面。
當被問到覺得自己有何吸引力時，鄧不諱言因自己有錢、健談、無架子、樣貌不差，因此「好多女人黐埋嚟」，他又形容自己財富一世「使唔晒」，但亦會不時做善事。
提到樣貌，記者追問鄧何以看來比實際年齡年輕，他即細數養生之道：「我逢星期一、三、五食燕窩，不時食冬蟲夏草同埋長白山人參，一個月食兩次花膠，早睡早起，每晚都返屋企食飯、不煙不酒……。」他最後補充：「仲有見到女人要行開，愈後生愈靚就愈要彈開！」方能保持青春。
記者溫卓賢