政情：唐唐新路向 教人品酒？

不過，尋日就有個新講法，一直挺唐嘅全國政協委員李大壯就爆料話，有人覺得既然唐唐對紅葡萄酒咁有研究，可以考慮教人品酒喎。

身兼港台商貿合作委員會主席嘅李大壯，尋日開會後見記者，問佢知否唐唐有乜新動向，起初李大壯話唐唐喺選舉後需要時間休息同重整未來方向，但講講吓就突然爆料話，自己有好多飲酒嘅朋友，認為唐唐本身喺品酒方面好有天賦，加上中文大學有相關課程，所以認為唐唐可以考慮試吓教人品酒喎。

作育英才為服務社會

最耐人尋味嘅係，李大壯最後都加把口話，其實服務社會、作育英才都係可以做嘅事，莫非佢都贊成唐唐轉型做老師教人品酒呢？