政情：民協推「輸凸啦的名單」

民協主席廖成利就將所有備選人名，組成一張「輸凸啦的名單」，四出勸諫泛民政黨放下一黨私利，務必斟掂縮到三隊出選，否則隨時會輸到凸，令建制派坐享漁人之利喎。

民協副主席譚國僑話，民協目標清晰，認為泛民一定要取三席超級區議會議席，仲力銷如果民協出選，有助泛民擴大基層選票版圖，而佢哋亦好老定話民協穩列三隊之一喎。另一方面，民協亦嚴陣以待，將會派人喺九龍西、九龍東及新界西出選，組成一個貫通九龍同新界西嘅破釜沉舟「風車陣」。

呢個風車吹唔吹得郁仲係未知之數，但即使泛民協調失敗，佢哋只要搵多一個提名就湊夠十五個提名入閘，就連佢哋都講明「好熱衷」代泛民披甲上陣喎。