中環出更:中山才俊歡聚 歎金門高粱

年前創立中山青年協會嘅金至尊數碼行政總裁吳傑莊(Johnny),一直努力凝聚青年鄉親,日前佢就同一班兄弟姊妹齊齊聚會,一邊歎金門高粱酒,一邊擦生猛靚海鮮,氣氛十分融洽。當晚有唔少祖籍中山嘅名人後代都有出席,包括有孫中山嘅曾姪孫、孫必勝囝囝孫偉倫,名媛趙曾學韞二仔趙汝珩,許晉亨外甥郭永亮等,中山可謂人才輩出。

Johnny話,佢去年率領一眾會員到台灣作訪問交流,其中一個團體非常好客,臨走前仲送咗支金門高粱酒畀佢哋做手信添。支酒有成三公升咁多,Johnny諗極都唔知點飲好,所以一直將佳釀寄存在家,直至當晚開會,至有機會攞出嚟同會友分享。Johnny話,呢支高粱香氣撲鼻,入口順滑,但酒精就有五十八度,奉勸大家飲完之後都係唔好揸車喇!

潘偉業宣布婚訊

當晚玩具公司太子爺潘偉業(Albert)拖實女友鄺晶晶現身,仲即場宣布婚訊,已定明年一月喺港島香格里拉擺酒,趕喺龍年吉時同女友拉埋天窗,卓妮都講聲恭喜!Albert話自己並非中山人,但有兩間玩具廠喺中山,都算得上係半個鄉里。

同場仲有龍朝酒樓老闆李有全、黃大仙區議員何漢文及退居幕後嘅藝人陳昭昭(Cherry),Cherry係該會副秘書長。Cherry透露,佢父親喺柬埔寨有生意,為咗完成父親心願,未來打算創立「柬埔寨中山同鄉會」,繼續凝聚海外鄉親力量。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報