政情：煲呔曾索性摺埋收工
夕陽政府餘下任期唔夠一百日，貪盡海陸空嘅煲呔曾等收工已經等得不耐煩，所以梁振英（CY）前日一當選特首，煲呔曾就急不及待約CY尋日朝早見面，除咗「衷心」祝賀CY當選外，仲傾吓政府交接問題。不過，其實煲呔曾已經收咗工，點解？事關CY尋日已經以強勢進駐位於舊政府總部嘅候任特首辦公室，連團體都識轉去向CY請願，完全當煲呔曾透明，所以與其話係交接，不如話摺埋煲呔曾好過。
CY同煲呔曾傾完交接後，提到有幾樣嘢會跟進，包括CEPA、國家十二五規劃，以及國務院副總理李克強訪港期間提出嘅三十六項利港措施，目標十分清晰。
不過諗深一層，呢幾項工作煲呔曾老早就應該落力、瞓身去搞好，有乜理由搞到要交畀下屆政府接手呢？既然CY接手上述工作，慵懶嘅煲呔曾可以索性翹埋雙手唔使做，每月白豆幾十萬元人工等收工。
煲呔曾Hea住等收工，聰明嘅香港人都唔會過分期望，好似街工都識帶領一班工友去新特首辦請願，但佢哋嘅對象唔係煲呔曾，而係候任特首CY。CY參選前去過街工嘅論壇，難怪CY一當選，街工即刻向佢請願。足以證明團體已經對煲呔曾無晒期望，當佢透明。
「衷心」祝賀 此地無銀
講開又講，一直有傳煲呔曾喺特首選舉中「鋤梁扶唐」，所以前日CY當選，煲呔曾發賀文都慢幾拍，連隔籬埠嘅澳門都快過佢，明眼人一睇就知發生乜嘢事喇。煲呔曾自知小器醜行畀人踢爆，尋日佢見CY嘅時候，專登擠出一副皮笑肉不笑嘅虛偽笑容，仲大大聲話祝賀CY當選，再補句口話祝賀係「衷心嘅」，真係此地無銀。
煲呔曾表面懶係親切同誠懇，實情佢又係做緊戲，如果大家有留意佢嘅煲呔同袋巾，都係用上淺藍色，呢隻藍色之唔係唐英年參選團隊用嘅顏色囉，用意係咪想寸CY，咁就留待大家自行判斷喇。