政情：柯大俠娶新抱 冠蓋雲集
恒生銀行退休大班、中策集團主席柯清輝上周六榮升做老爺，第四仔Sunny迎娶加籍越南華僑Helen，喺灣仔會展筵開近七十圍，孻仔爬三個阿哥頭成婚，遲來先上岸。柯大俠喺政商界人面廣，喜宴上冠蓋雲集，除咗中策集團前主席馬時亨、百仁基金主席施榮忻、莊士集團太子爺莊家彬外，仲有福建社團高層林樹哲。原來柯清輝太太係林樹哲嘅表妹，兩家親到極。
致詞幫新郎「補飛」
首次娶新抱，做新老爺嘅柯大俠全晚都好風騷，見囝囝發表嘅感人宣言漏咗感謝外父外母，佢上台致詞時就即時幫手「補飛」，話感謝親家將個好女兒交畀佢個仔，認真識做。
柯大俠又真情剖白，慨嘆多年來忙於工作，每年只有兩至三個月與身在加國讀書嘅兒子相聚，難得Sunny好生性，眨吓眼就成家立室，身為爸爸真係飲得杯落。