政情：廉潔大倒退 貪曾貽害
香港號稱廉潔城市，廉政公署更破過唔少大案，打過唔少大老虎，成功將七十年代貪污成風嘅香港，擺入歷史書櫃。香港好在有ICAC。但不知廉恥貪盡大小便宜嘅「貪曾」曾蔭權，卻因為一己私欲將本港嘅珍貴廉潔制度徹底破壞，令香港廉潔程度大倒退，落得如斯田地，七百萬人要「多得」曾蔭權呢個香港第一大貪官，搞到香港行路打倒褪。
人民力量陳偉業不齒「曾濫權」近日嘅連番貪腐醜行，尋日佢就上電台力數曾蔭權嘅不是。大舊話，今年係香港回歸十五周年，但實在唔值得慶祝，因為今年係最醜陋嘅一年，唔止特首選舉互揭陰私，估唔到香港維持咁多年嘅廉潔制度，一個唔該畀曾蔭權打爛咗。
陷700萬市民於不義
佢話曾蔭權作為特首，做過四十幾年公務員，無可能唔知道咩叫「比白紙更白」。佢又批評曾蔭權道歉時完全無誠意，更將責任推卸畀七百萬市民，話係市民道德標準提高咗，咁講法即係毫無悔意，唔止係對唔住十六萬公務員，更陷七百萬市民於不義。
大舊仲話，如果睇番以往例子，就知道曾蔭權無可能唔辭職。好似○三年時任財政司司長嘅梁錦松偷步買車，當時都無犯法，但梁錦松喺各界施壓下，最終都要下台辭職，如果曾蔭權一句「無犯法」就為自己開脫，絕對視問責制如無物，將港人賴以自豪嘅廉潔制度徹底粉碎，真係要多得呢個煲呔曾。
香港廉潔制度得來不易，大舊話因為中國人從封建制度開始，已經熟習貪贓枉法，就算滿清政府被推翻後，國民黨仍然受貪腐影響，而最貪腐嘅共產黨當然係「貪中之貪」，不能不提。所以香港作為中國城市之一，能夠建立有高效監察性嘅廉潔制度，絕對唔係天跌落嚟，而係靠每一個港人雙手自強不息，屢次向貪腐說不而爭取番嚟。
亦係因為香港有廉潔呢把寶刀，至令到香港能夠同其他中國城市完全唔同，就算上海、深圳近年如何經濟起飛，始終敵唔過香港嘅廉潔及司法制度。所以大舊呼籲市民，唔應該再容忍曾蔭權呢個貪官，要坐言起行，履行公民責任向政府說不，以行動保衞港人核心價值。