政情：立會健身房變毒氣室
早前本報揭發立法會新大樓毒氣四散，至今仍未解決。根據立法會秘書處喺上星期五嘅測試結果，雖然發現新大樓各處空氣內嘅總揮發性有機物（TVOC）含量大致合格，但五樓健身室同儲物室竟然無事變有事，TVOC含量分別由二百個ppb，急升至三百一十一個ppb及三百二十個ppb，衰啲講句，健身室變毒氣室，議員都係少去為妙。
經常去健身室嘅大有人在，好似民主黨李永達（高達）、工黨主席李卓人都係捧場客，高達仲趁開會前後嘅空檔，用跑步機健身，然後去廁所沖番個靚涼。前排新大樓爆出多處水龍頭有退伍軍人症桿菌，偏偏就係健身室個廁所冇，咪就係因為高達經常光顧，令惡菌無法積聚孳生囉！
依家健身室變成毒氣室，如果議員要入去做運動，真係要帶埋個氧氣筒入去至好，名副其實係「帶氧運動」！