政情：水戰風波 劉鳴煒封嘴
華置副主席劉鳴煒去年中喺山光道跑馬地會所游水期間，疑被前高官兼港交所前行政總裁鄺其志（神童志）撳落水事件，成為政圈熱話，但劉鳴煒同神童志恩怨有幾深，至今仍是個謎。
劉鳴煒尋日出席華置旗下商場活動時，見佢西裝骨骨，表現風騷，似乎心情未被事件影響，但一提起神童志，佢就唔願多講，叫記者講番個宣傳活動。
宣傳活動上，記者蜂擁上前追問劉鳴煒點睇「水戰」單嘢，佢似乎有備而來，不慍不火回應話：「今日淨係講華置！」記者再追問佢對馬會判罰神童志嘅結果係咪滿意，佢嘅答案都係好標準：「今日只講華置！」任憑記者再三追問，劉公子都係封嘴唔講，就連之後嘅傳媒聚會都缺席。咁又係嘅，一個血氣方剛嘅後生仔畀個退咗休嘅長者咁搞法，唔想講都唔出奇嘅。