政情：田少私廁 多人用防菌？
添馬艦新政府總部及立法會爆發退伍軍人症桿菌風波，喚起各界醒起要為大廈檢查喉管及水質。旅遊發展局主席田北俊對事件亦感到驚訝，原來佢嘅辦公地點都有私人洗手間，但好彩係「唔知點解好多其他人使用」，令到水喉水嘅流動性都高啲，減低桿菌積存孳長嘅機會喎。
講起新落成建築物都發現有退伍軍人症桿菌，呢個現象都考起田少呢位地產發展商，佢話以前工廠多用水塔就話會發現退伍軍人症桿菌啫，乜原來新落成嘅大廈因為無清洗水缸都有可能積存退伍軍人症桿菌，真係未聽聞過。田少話，有啲新落成嘅私樓擺幾耐先發售，買家入伙時都未必會洗水缸啦！
講開又講，嚟緊星期日係田少牛一，佢話當日亦都係一位已故名人嘅生日，係邊個呢？原來係搖滾樂巨星「貓王」皮禮士利喎！