香港人頭腦真係好鬼死靈活㗎，尤其係擅於利用空間。一場僭建風暴有眼你睇，上自特首局長副局長，下至新界鄉紳原居民，一個二個有辦法違規打造僭建物，所住空間無中生有，真係鬼斧神工嘆為觀止。當中特別係新界鄉紳原居民令人拍案叫絕，明明有人違規僭建，哈，佢哋居然惡人先告狀，針對聲稱執法取締嘅發展局局長林鄭月娥，利用「影像暴力」燒人張相仲叫人去死喎。
大概因為僭建成風，所以搞到食肆也瘋狂，照辦煮碗齊齊無中生有擴充營業。好似食肆林立嘅灣仔謝斐道咁吖，不少橫街窄巷都被私有化，街坊街里大開眼界。有一位張女士喎，早前光顧一間茶餐廳，發覺裏面柳暗花明又一村，店舖設有側門通向橫巷，橫巷搭建簷篷同鐵閘變身秘密食堂，令營業範圍大大擴充。咁都唔止，秘密食堂竟然容許煙民吞雲吐霧，公然違反禁煙令。討厭二手煙嘅張女士睇唔過眼，分別向屋宇署同控煙辦投訴啦，點不知情況一直冇改善。
記者按圖索驥走去實地視察，發覺僭建情況屬實，秘密食堂可以容納六至七張枱，足以招呼二十位食客。除咗呢一間茶餐廳出蠱惑之外，原來隔幾個舖位嘅另一間食肆亦以同樣手法擴充營業，你都咪話唔誇張。
更加誇張嘅係，屋宇署承認早於○四年已經向擴充營業嘅兩間食肆發出清拆令，要求拆除地舖側面同後面天井嘅僭建物。即係話，特區官僚七年前已經知道有人違規經營，居然事隔咁耐都冇撥亂反正，咁仲唔係失職？難怪有區議員批評屋宇署跟進緩慢：「屋宇署跟咗七年個僭建物仲喺度，真係好難理解！」
計功夫茶話齋，其實都唔算好難理解嘅啫，事關龜步蟻躝係本地官老爺嘅一貫作風。大家睇下村屋僭建問題吖，一拖就拖咗幾十年，申訴專員已經唔係第一次發炮狂轟政府疏於執法，咁先至觸發今次席捲全城嘅僭建風暴之嘛。新界村屋僭建問題固然未解決，市區樓宇僭建問題同樣未解決，所以咯喎，食肆僭建問題拖得就拖唔可以話難以理解。
之不過又話分兩頭，聽講林鄭月娥係一個好打得嘅局長，而且政府機器擁有龐大資源，幾乎無堅不摧嗰隻，若然下定決心強勢執法，冇理由做唔到。
計功夫茶話齋，取締僭建物最緊要係有決心，亦要有勇氣對付畫地為王嘅惡霸。林鄭如果唔想做一個不負責任嘅局長，實在有必要雷厲風行取締全港僭建物，包括將橫街窄巷私有化嘅食肆。你知啦，夠鐘拍拍屁股走人，留低一堆蘇州屎畀下屆政府，好肉酸㗎！