政情：IT選委嘥紙瘋狂「斬樹」
香港地每搞一次選舉，都耗費唔少紙張做候選人宣傳單張，次次都斬咗幾千棵樹。啱啱完成嘅選舉委員會選舉，就造成幾十噸廢紙。環保觸覺尋日踢爆，各選委界別中以資訊科技界最唔環保，六十一個候選人夾埋寄出咗廿七萬份宣傳郵件，平均每名選民收到四十三封，信箱細啲都畀佢塞爆。有候選人仲要每封信都內附一隻已經冇人會用嘅舊式電腦磁碟，但最後都係低票落選，真係唔扔落垃圾桶，都唔知可以做乜。
環保觸覺抽查咗選委會其中四個界別分組，包括IT界、社福界、教育界同建築測量界，發現單計教育界已經製造咗十六噸廢紙，選舉期間共發出一百萬份宣傳郵件。但計番條數，由於教育界選民人數有成十萬人，所以平均嚟計其實唔算最離譜。
當中最離譜莫過於IT界，選民人數唔夠六千，但竟然寄出廿七萬份宣傳郵件，有選民更一次過收到四十幾封宣傳郵件。好似獨立候選人吳傑莊（Johnny）咁，每個選民都寄一隻磁碟出去。由民建聯葛珮帆帶隊嘅ICT動力亦唔好得去邊，廿四個候選人已經每人一封信，部分成員好似葛珮帆咁，仲要自己寄多封，然後廿四人一齊再寄一封。
環保觸覺主席譚凱邦炮轟呢班IT界選委，話佢哋身為IT人，理應活用電子方式宣傳，但估唔到佢哋都係用番最古老、最唔環保嘅方法宣傳自己。我哋問過Johnny，佢話的確有選民向佢反映，話寄咁多磁碟出去唔多環保，但佢死撐呢個世代早已冇人用磁碟，個個用晒光碟，所以呢幾千隻磁碟全部都係冇人用嘅倉底貨，唔算大問題。佢又話特登用磁碟呢樣過時產物宣傳，係想帶出「去舊迎新」嘅概念喎，真係唔明佢諗乜。
一半選民冇電郵地址
不過Johnny都講明，其實作為IT界參選人，真係想寄電郵多啲，一來成本平好多，二來工夫亦做少啲，但係佢睇過選民登記冊，發現只得一半選民有提供電郵地址，候選人要接觸另一半選民，唔用郵寄真係無乜辦法，希望選舉事務處下次可以提供更多資料。原來斬樹最大元兇並唔係IT界，而係冇與時並進嘅選舉事務處！