中環出更：湯修齊太空裝 閃爆博愛騷
今屆董事局成員多到爆燈嘅博愛醫院，日前喺會展舉行年度慈善餐舞會，董事局一眾善長空群而出，型男美女雲集逼爆現場。是夜主題係太空漫遊，主席湯修齊（Henry）及候任主席潘德明最有心思，成身銀灰色閃爆裝扮，似足來自外太空嘅紳士。眾人載歌載舞，玩到High爆。
Henry與囝囝Harris，以勁歌熱舞為開心派對揭開序幕，太太Yvonne及囡囡上台獻花，溫馨到不得了。靚仔醫生莫樹錦、立法會秘書長吳文華都嚟趁熱鬧，齊撐總理莫兆光。做咗總理多年嘅佳能高級副總裁鄧慶治，幾忙都抽空嚟打氣。
現場有兩位高大型男備受矚目，佢哋係總理現代美容集團主席曾裕嘅老公李守義，以及從事貿易及地產投資嘅總理趙瑤老公林辰峰。婚後定居香港多年嘅台灣知名歌手張清芳亦現身同樂。
陳李妮投雍正九代孫墨寶
太子珠寶鐘錶主席鄧鉅明夫婦及執董朱繼陶夫婦，都撐到散場，事關太子慷慨贊助多款名錶供拍賣籌款。清雍正皇帝第九代孫兒愛新覺羅啟驤亦捐贈親筆書法作品《靜以修身》，台下善長爭相舉牌激烈競投，結果由副主席陳李妮（Lily）以七萬五千元投得。Lily話等西貢大屋起好之後，要掛喺新居欣賞。
卓妮