中環出更：聖保羅160周年名人舊生齊賀壽
名人輩出嘅聖保羅書院，尋晚喺會展筵開二百圍，慶祝一百六十周年校慶。前金融管理局總裁任志剛都以舊生身份賀壽，任總唔止數口精，歌喉更勁。原來佢曾以男高音身份，橫掃多個校際歌唱比賽。睇嚟任總改行出唱片，應該幾掂。
任總係合唱團歌王
母校生日，超過二千五百位校友、師生雲集，場面墟冚過台慶。多位名人校友重拾那些年情懷，賞面撐場。任總穿起大褸，拖住太太笑咪咪入場，風騷到極。
卓妮八到，任總喺一九六五年轉校到聖保羅讀中五，算得上係大師兄。咪睇佢好嚴肅，原來任總係聖保羅合唱團台柱之一，堪稱歌王。
有「人大歌劇王」之稱嘅港區人大代表馬豪輝話，當年曾同任總同台唱歌，齊齊參加校際歌唱比賽，仲以一首《鳳陽花鼓》奪冠，認真威水。
卓妮問任總如今會否技癢再踏台板，佢就笑騎騎話：「無喇！」
傳染病專科醫生勞永樂都係知名嘅校友之一，聖保羅係男生嘅天下，但勞醫生就爆料，七三年當佢讀緊中六嘅時候，校方曾經破例收女生，結果班上來了唯一一位女同學，佢樣貌標致，令男生們眼前一亮，紛紛發動追求攻勢，可惜最後統統都失敗而回。
尋日勞醫生重遇呢位靚女同學，趁機擁抱對方，好得戚咁話：「當年我無機會攬佢，今日終於得咗嘞。」
踢西瓜波重溫那些年
舊校友仲有踢「西瓜波」的回憶，現任旅遊事務助理專員嘅校友會主席馮浩賢話，因為校園較細，踢真波危險，同學都改為踢「西瓜波」，呢個傳統代代相傳，尋晚會場都整咗個龍門，等校友重溫吓踢西瓜波的日子。
卓妮