中環出更：青聯羅詠詩入交通安全隊
交通安全隊西九龍總區成立十五周年，尋日喺跑馬地馬會會所舉行慶典暨長官就職禮，服務咗十二年嘅鐘錶業總會前主席梁青華，再度獲委任西九龍總區指揮官。香港青年聯會賢慧社主席羅詠詩（Anthea）、鐘錶業總會副主席張繼東等一眾年輕人，亦首次加入呢個大家庭，大家着住制服好有隊形。
Anthea嘅加入令團隊生色不少，原來佢係跟香港青聯副秘書長何國禮及司庫林志偉嘅腳步加入。林志偉係署理助理總監，何國禮就係總隊監，佢哋帶埋Anthea一齊將服務青年嘅熱誠，延續到宣揚交通安全工作，認真唔話得。
梁青華落區 推廣小巴安全
雖然梁青華工作繁忙，但佢全情投入交通安全隊嘅義務工作，下星期四又要去九龍塘派傳單，向市民推廣小巴安全知識，咁落力，難怪華哥胸前獎章愈嚟愈多喇！