政情：喇沙校長樂做吉祥物
本港名校喇沙書院除咗注重學業，亦好重視體育運動，尋日港九區D1足球賽決賽，喇沙書院對張振興伉儷書院，作為體育發燒友嘅校長賀敬修士就到場親身打氣，仲幫學生拎獎牌。原來賀敬修士係喇沙嘅吉祥物，皆因佢做校長兩年，喇沙喺學界大賽捷報頻傳，校隊成員都話佢好腳頭喎！
除咗賀敬修士，喇沙書院兩位前校長湯瑪士修士及柏德修士都有亮相，點解咁齊人？原來對面張振興都係喇沙修士會嘅學校，呢場決賽變成喇沙嘅私人派對，所以咁熱鬧。
賀敬修士愛長跑
來自新西蘭嘅賀敬修士年輕時好鍾意運動，佢笑稱自己打欖球唔夠大隻，打籃球又太矮，後來加入長跑隊。賀敬修士話，喇沙書院就好似一個大家庭。梗係啦，喇沙書院出過好多社會名人領袖，每次學校出席重要賽事，成班校友都會出嚟撐場，幫學弟後輩打氣，佢哋好團結架！