中環出更：名人川流不息豚王新店嘗鮮
位於中環蘭桂坊嘅豚王拉麵，門口幾時都大排長龍，想一試箇中滋味，少啲腳骨力都唔得。豚王拉麵第二間分店尋日開幕，落戶銅鑼灣登龍街，餐廳老闆鄧振豪同爸爸佳能高級副總裁鄧慶治（Mingo）交遊廣闊，開幕後先招呼城中逾百名老友免費嘗鮮。由下午三點半至夜晚十點，城中名人川流不息，令鬧中帶靜嘅登龍街變得好熱鬧。
鄧慶治父子客串侍應
爭相一試嘅名人有馬會大董葉澍堃同囝囝葉瀚華、「快勞夾大王」杜振源同囝囝杜擴業夫婦、板長壽司老闆鄭威濤、米蘭站老闆姚君達夫婦、立法會議員石禮謙同女友等，各人各自搵自己方便嘅時間嚟捧場，場面似足流水席。Mingo同振豪兩父子親自迎賓、送客甚至落柯打，忙到不可開交。
Mingo話，主廚特登熬煮由豬骨及立魚為材料嘅湯底宴客，平時有錢都食唔到。濃郁鮮甜嘅湯底加上煙靭嘅拉麵，食到眾人讚不絕口，如果滿分係十分嘅話，杜振源話要畀十一分，仲勁讚餐廳係城中拉麵王添！
老闆振豪就話，新舖唔止座位多咗，菜單選擇亦多咗兩款，包括由咖喱炮製嘅「元氣王」湯底及以蝦為材料嘅「海老王」湯底，而且新舖供應十足，唔似中環店每日最多賣三百碗，所以食客可以大飽口福喇！
卓妮