大家有冇聽過網上極之流行嘅金句「而我不知道陳偉霆是誰」？功夫茶係就係有聽過，之不過咁，功夫茶確確實實不知道陳偉霆是誰。聽講，金句嘅意思係諷刺知名度低又博出位嘅歌手。至於金句嘅來源，大家不妨上網搵一搵。有趣嘅係，你只要喺搜尋網站打上一個「而」字，即刻會彈出完整嘅一句，證明流行程度無與倫比。
知名度低嘅歌手就話冇人識啫，堂堂國家領導人應該街知巷聞喇啩。好嘞，功夫茶問問大家，現任國家主席係邊個呀？如果你答胡錦濤，恭喜你，你應該係一個正常人；如果你答唔知道，同樣恭喜你，你應該係一個精力充沛嘅年輕人，不過四肢發達頭腦簡單咗少少咁解。
有教育基金調查發現，百分之十五受訪中六同中七學生答唔出國家主席係胡錦濤，顯示基礎知識薄弱。
呢嗱嗱嗱，都話香港教育失敗o架啦，學生哥讀咗十幾年書，居然有眼不識泰山，出現「而我不知道胡錦濤是誰」嘅反智狀況。如果你話「而我不知道副局長是誰」，咁就唔會有人怪你無知啫，事關香港嘅副局長好得意o架，一個二個唔係潛水就係隱形，冇人知佢哋到底係阿茂定係阿壽。之但係，鼎鼎大名胡錦濤喎，盛世中華大哥大喎，答唔出國家主席芳姓大名真係要打屁股啦！
計功夫茶話齋，呢一項調查唔止顯示學生哥基礎知識薄弱，更加顯示通識教育實在太糊塗。喂，通識教育唔係上至天文、下至地理通通要識嘅咩？要學生哥明白愛因斯坦相對論就話有少少強人所難啫，打開報紙飽覽時事新聞係易過借火嘅一件事，隨時隨地都見到胡錦濤三粒字啦。如果咁都唔識，功夫茶強烈思疑老師偷懶，冇要求學生睇報紙，更加冇要求學生關心國家。
咦咦咦，一提到關心國家，弊傢伙嘞，香港教育局何德何能強制推出德育及國民教育科？雖然未來嘅國民教育有可能係洗腦教育，之但係你都要有足夠嘅基礎知識先至可以成功洗腦吖嘛。譬如話，你想教到下一代盲目愚忠於中國共產黨，萬一學生哥傻更更表示「而我不知道共產黨是誰」，咁咪捉蟲囉，教育界擦鞋仔點樣向京老爺邀功領賞呀？
講開又講，兩個疑似特首候選人都話有必要啟動國民教育，功夫茶真係想問一問兩個忠君愛國不遺餘力嘅傻仔，閣下到底知唔知香港教育嘅問題所在呀？教育局一方面忽視中國歷史，一方面鼓吹國民教育，絕對係本末倒置。中國歷史本身咪就係最佳嘅國民教育囉，懵丙！