縮骨治港的煲呔曾，臨卸任依然唔認自己無能無才無德，卻大放厥詞指跟傳媒係「雞同鴨講」、「對牛彈琴」，有記者問佢退休後有何打算，佢即時回應「唔見記者囉！」
煲呔曾之小家與「修養」，以及剛愎自用、死不悔改可想而知。香港之亂象、民怨叢生，可以話係佢管治無能最佳寫照。佢話：要真正解決貧富懸殊，只有共產主義。大佬啊！香港之貧富懸殊，主因係政府政策短視、庸官無能，好似佢親兄弟鬍鬚曾年年「狼來了」，年年估錯數，庫房水浸，年年上演「官富民窮」，呢個就係煲呔曾管治下嘅特色！
民生多艱，煲呔曾一味吹水「提高社會流動創富」，廢噏「財政紀律」；而鬍鬚曾成日開動人肉錄音機：量入為出，應使則使。講出來笑死人，政府就係唔應使就手鬆鬆。養一大班副局、常秘係唔係應使則使？無能部門如水務署一年少收過億水費點計先？房委會又話豪花一千七百萬搞慶祝公屋六十年……
至於民生，就關人個關！據云，鬍鬚曾任內最後一份預算案未有承諾「開倉派米」，臨走都要做守財奴。
嗱！唔好話老朽唔提醒煲呔曾及鬍鬚曾，有調查話九成六被訪者認為政府派六千蚊最令人開心！事實擺在眼前，你睇澳門市民對派七千蚊就知喇！為政不以百姓之心為心，不以民為本，以適其欲，肯定冇運行！唔「開倉派米」紓困，屆時唔係你唔想見記者，而係全港市民唔想見到你。早啲走吧，弱雞無能雙雙乞人憎！