明年三月將會選出新任行政長官，以為任期所餘無幾嘅煲呔曾有自知之明，收埋自己唔見人，誰知佢好似唔畀人鬧唔舒服，尋日接受報章專訪，將香港年輕人嘅怨氣歸咎於佢哋「理想大」，怨社會唔公義，因此唔服從民主制度喎，變相狠批香港年輕人「大想頭」，同前政務司司長唐英年嘅八十後「車毀人亡」論有得揮。咁唔知醜嘅言論一出，當然即時惹來網民狂插啦。
喺一個聚集大量年輕人嘅討論區上，網友們都踴躍對煲呔曾嘅言論發表意見，簡單啲講就係狂炳、狂鬧。網民「為公義發聲」一針見血話：「自己無能，走去賴年輕人！」、「一米九四」就揶揄煲呔曾：「轉過頭又話年輕人無志氣。」、「Intel_King」就不齒咁話：「怨氣源自曾蔭權。」
由於煲呔曾嘅言論實在太討厭，呢篇專訪轉載未幾，即收到大量聲討嘅留言，短時間內已經有過百回應。「LonelyLun」笑稱：「你做好啲，我哋邊有得怨？」、「三潭秋」亦直斥：「淨係識養錦鯉，你估香港人係你嗰幾條昭和三色咩！」臨走都走去挑釁年輕人，到底煲呔曾個腦係點運作o架呢？