政情：張宇人畀街坊點錯相
飲食界選委爭崩頭，自由黨張宇人（Tommy）同廠商會黃家和各自支持名單互撼。為咗增加勝算，Tommy尋日率領一班選委候選人去北角春秧街街市拉票，但街市商戶似乎唔係好識Tommy，有人叫錯佢個名，仲有街坊認錯佢，叫佢做「張醫生」，搞到情況好尷尬。
不過，Tommy話啲選民唔認得佢唔緊要，因為佢冇參選，最緊要係班選委候選人有人認得喎。
一班候選人當中，以海洋公園主席盛智文嘅知名度最高，好受女士們歡迎，有女士更變成小粉絲，又要合照又攞簽名，但點知一開口就出事，有人問：「乜你唔係搞海洋公園咩？」睇嚟喺班街坊心目中，仍然唔知盛智文係「蘭桂坊之父」。
Tommy又話，一早向班候選人落命令，叫佢哋呢兩個月唔可以周圍請人食飯，以免有賄選之嫌，連自己伙記都唔可以請，直到選完為止喎。Tommy講到咁白，擺明係含沙射影啦！