政情：肥亨囡囡籲捐六千蚊
政府派六千蚊，唔少人已經攞到手，大家諗住點使呢？前商務及經濟發展局局長馬時亨兩位千金馬露明（Christine）同馬露玲（Andrea）呢對姊妹花愛心無限，日前發動咗一個名為「GeneroCity」嘅慈善項目，呼籲社會各界捐出六千蚊，幫助有需要嘅小朋友同家庭，發揮互助互愛精神。
「Generosity」意指慷慨、無私嘅行為，而「GeneroCity」就取其諧音，寓意將呢份慷慨嘅心發放到社會每個角落。首個計劃「GeneroCity教育及兒童發展計劃」，將為深水埗逾百名六至十二歲嘅兒童提供功課研習、興趣班、外遊活動等課後活動，重點教育「六大品格支柱」，包括尊重、盡責、公平、可靠、關愛同公民責任。
Andrea話，呢個項目有如一個匯集全城愛心嘅平台，匯聚大家嘅資源、時間同技術，投放到有需要嘅兒童身上。家姐Christine就話好多謝熱心人士咁慷慨捐助，GeneroCity已經籌到過半目標善款，覺得好興奮，期待大家同心合力，為香港帶來幸福。