政情：CY競選班底曝光
兩名即將宣布參選嘅疑似特首候選人梁振英（CY）同唐英年快將展開大比併，除咗比較治港理念外，令人眼前一亮嘅競選團隊亦會加分。據聞CY嘅競選班底埋班工作已經七七八八，當中包括立法會會計界議員陳茂波、市區重建局主席張震遠、前立法會建築、測量及都市規劃界議員劉炳章、港區全國人大代表羅范椒芬等，連一向為民請命嘅全國政協委員劉夢熊到時亦會拉隊為CY宣布參選站台，陣容鼎盛。
率先曝光嘅梁營助選班底陣容，除咗來自多個專業界別外，據梁營中人透露，多名前高官亦會幫手出謀獻策，例如前衞生福利局副局長何永謙、房屋署前副署長鄔滿海等，當然要計埋熟悉教育嘅前教統局常秘羅范椒芬啦！
近日有傳投資推廣署前署長盧維思嘅公關顧問太太黃麗君（Fanny）亦曾同梁營開會，倘若Fanny真係暗助梁營，相信一定會好戲連場。我哋尋日循兩個途徑搵過Fanny，但未有得到回覆。
唐唐保唔住中出票倉
梁營助選陣容龐大，相對競選班底一直諱莫如深嘅唐唐，尋日畀人踢爆佢因為冇交會費已非中華出入口商會會員，枉佢當年喺進出口界起家。有消息話，雖然唐唐嘅細佬唐慶年成功循中出自動當選為選委，但中出入面並非鐵板一塊，好似中出現任會長莊成鑫講到明唔會綑綁式投票，仲話自己又會為CY站台，據聞中出副會長、一曲《我是中國人》唱到街知巷聞嘅張明敏到時都會撐場喎，換句話，唐唐喺中出呢個票倉真係危危乎。
唐唐尋日冇公開活動，而且競選網站亦暫停更新資料，相對CY尋日就繼續落區爭取各界支持。CY先後出席旅遊界同醫學界嘅論壇，期間以太太同女兒做例子冧盡業界中人，例如佢話太太有時會喺網上訂機票，但佢堅持搵旅行社代訂機票，因為保證唔會冇得起飛喎！話時話，梁營嘅攻勢一浪接一浪，唐營真係要諗下點接招同扭轉劣勢喇！