行人路過窄 焗用單車徑
近年上水人流愈見暢旺，行人路「人車爭路」情況更不時發生。陳先生指出，日前經上水新運路前往港鐵站期間，發現行人路過於狹窄，不少途人被迫走上單車路，製造人車爭路場面，致險象環生。陳指新運路設有多個巴士站，上下班時間擠擁情況嚴重，「啲人等巴士會企滿晒條路，條路又窄，仲要加幾個花槽放喺中間阻住，唔行落單車路都唔得啦！」
運輸署發言人表示，由於上址有多條巴士路線設巴士站上落乘客，故一直有留意該處人流，並於過往一年進行改善工程，包括移除部分花槽，日後亦將繼續監察相關情況。
「淨係移走幾個花槽邊度夠呀，要諗吓擴闊成條行人路啦！」陳先生指僅靠移開花槽做法治標不治本，「條單車路闊過行人路咁多，係咪要諗吓個規劃出現咗咩問題呢？」