社民連喺今次區議會選舉全軍覆沒，當中曾健成（阿牛）就更加以不足五十票之差輸咗畀無黨派人士李進秋，除咗搞到社民連上下一片愁雲慘霧外，阿牛都要考慮係咪結束位於柴灣道高威商場內嘅議員辦事處，面臨關門大吉嘅危機，但佢計劃籌募租金繼續營辦服務街坊。
雖然阿牛喺區選輸咗，但依家仲有好多街坊會去辦事處搵佢幫手。不過，阿牛日前喺社交網站facebook留言話，由於佢落選，區議會唔會再為佢提供辦事處租金津貼，如果再無錢交租嘅話，辦事處就可能要停辦喇。此言一出，唔少街坊同朋友已經即時響應，幫佢諗辦法籌錢交租。
阿牛話，其實辦事處月租只係二千幾蚊，唔算好貴，又話無咗大本營會覺得好可惜。
阿牛仲話，如果真係籌唔夠錢，要執咗個辦事處嘅話都無計啦，到時班街坊可以去隔籬街嘅民間電台辦公室搵佢，咁就可以繼續幫班居民排難解紛喎。