政情：袁莎妮獲平反笑開懷
無辜捲入疑似特首候選人唐英年感情缺失嘅香港總商會總裁袁莎妮，前日出席最低工資委員會諮詢會時，一見記者就閃避，而且全程嬲爆爆，粒聲唔出。不過，尋日佢跟總商會參觀立法會新大樓時，臉上展現近期難得一見嘅燦爛笑容。兩日之間有咁大轉變，莫非因為前日唐唐還咗佢一個清白？
前日唐唐首次同傳媒聚會時，公開澄清自己嘅感情缺失「同公職、公職人員無關」。就喺上述講話發表前嘅上午，袁莎妮正出席最低工資委員會諮詢會，除咗走後門外，面色仲唔多好睇。點知唐唐澄清後，尋日袁莎妮陪同總商會主席胡定旭、常務副主席周松崗等高層到訪立法會新大樓時，態度判若兩人。
袁莎妮被傳媒撞到，難免繼續被追訪，唔少總商會中人都好識做，不斷掩護伊人離開。不過，避得一時、唔避得一世，記者不斷追問，係咪唐唐已經還咗佢一個清白？袁莎妮依舊不作回應，但起碼笑容可掬，唔再係一副閉翳樣。咁咪好囉，笑吓先至靚女嘛！