政情：CY：誰比誰好 自有公論
疑似特首候選人唐英年日前自誇好過疑似對手梁振英（CY），CY尋日現身園景師周年晚宴後話，不評論自己表現，因為想交畀市民評價，相信呢樣嘢市民自有公論喎。至於CY事先張揚廿七日宣布參選，佢話無非因為早就答應大家一選定參選日子就立即公布，講到競選班底有啲乜嘢人、各人角色係乜，到時就會知喎。
陳茂波寸唐唐炒冷飯
挺梁嘅立法會「五散人」陳茂波（Paul）尋日亦發功，明踩唐唐倡議將強積金市民供款交畀外匯基金投資呢條橋無新意，佢話：「呢個idea唔係新o架喎！」至於坊間有講法話CY根本唔會取得足夠提名選特首，阿Paul話呢啲只係翻炒舊聞，目的係想人入唔到閘。
反觀唐唐嘅「家臣」、另一散人林大輝，就強調自己無講過中央欽點咗唐唐，仲話：「我唔係梁營、唐營，係自己好有型。」對於日前唐唐聲言任何人嘅言論不代表佢，間接同大輝劃清界線，但大輝仍然好撐唐唐，認真唔話得。至於唐唐尋日就冇公開活動，只係見佢下午四點幾同競選團隊急急腳離開灣仔美國萬通大廈競選辦公室。