政情：雙曾親疏有別出哂面
煲呔曾亂港七年其中一大罪狀，就係喺委任高官、公營機構高層、以至各類法定機構同諮詢委員會時，大玩親疏有別，淨係識搵啲同聲同氣嘅自己友，剛公布嘅市區重建局董事任命就係又一例證，多名「反對派」董事只獲續任一年，其他人就續任一年半至三年。而煲呔曾個「哎吔細佬」財爺鬍鬚曾，亦喺預算案諮詢會面安排上明益保皇黨，真係上樑不正下樑歪！
政府尋日公布煲呔曾已委任十名市建局非官方董事，其中九人係再次委任，但續任年期就分做三類。其中四名董事、包括親建制嘅西九新動力兼C18成員黃以謙，就一次過續任三年；另外兩名來自學術界嘅董事就續任一年半；餘下三名有政黨背景嘅董事公民黨陳淑莊（Tanya）、民主黨涂謹申（阿涂）同工聯會黃國健（KK），就只獲續任一年，好明顯係大細超。
Tanya、阿涂同KK咁啱都身兼立法會議員，令人聯想政府唔同佢哋續任咁耐，係擔心三人會喺明年立法會選舉落選。不過，另一身兼立會議員嘅市建局董事、來自最大保皇黨嘅民建聯葉國謙，任期就到二○一三年中先至屆滿，比該三人長半年，顯示今次續任安排同議員身份或政府嘅「六六規定」無關，相信係關乎佢哋撐唔撐政府，係咪乜嘢政策都盲目護航。
KK常批政府「種禍」
Tanya同阿涂都來自泛民主派，煲呔曾唔鍾意佢哋都係意料中事，反觀KK雖然不時都會公開批評政府，但始終係來自根正苗紅嘅工聯會，煲呔曾咁都容不下，證明佢真係好小器！
另一邊廂，鬍鬚曾下周二起分批會見各黨派議員，就明年二月發表嘅任內最後一份預算案收集意見，獲安排首先見面嘅，當然唔使講又係民建聯啦！至於安排喺最後嘅亦毫無驚喜，就係政府嘅頭號公敵公民黨。古語有云：「人之將死，其言也善。」但估唔到雙曾臨離任前都搞埋呢啲親疏有別、大細超嘅小動作，想唔淪為千古罪人都幾難喇。