政情：林松茵投訴白鴿打壓
今屆區議會選舉選情激烈，連帶選舉投訴都特別多。沙田顯嘉選區候選人林松茵尋日投訴被同區民主黨候選人莫偉雄多次打壓，除咗禁止佢嘅助選團派發宣傳單張外，佢上星期企喺條街同選民打招呼，隨即被十幾個保安包圍，又唔畀佢喺顯徑上村拉票，令佢唔可以同啲選民接觸。相反，莫偉雄多次利用顯徑村業主立案法團主席身份喺村內拉票。
林松茵仲話，早兩日有人用該村管理委員會嘅名義，將一封警告信貼喺佢嘅宣傳海報上，批評佢嚴重違反協議，佢批評事件完全係政治抹黑，目的係要令到佢無得當選。我哋尋日致電莫偉雄查詢事件，但直至截稿前未有回覆。
另外，有沙田馬鞍山利安選民前日收到署名為「一群看不過眼的親友」嘅信件，內容大概係話利安選區候選人民主黨麥潤培搞嘅活動，有居民因座椅折斷搞到骨折，而麥潤培就逃避責任。麥潤培尋日澄清話，自己只係當日歌唱表演嘉賓，又話事發後已即時跟進事件，唔明白寫抹黑信嘅人有乜居心喎。該區候選人仲有民建聯羅棣萱。