政情：銅像唔似發叔似狄龍
鄉議局主席劉皇發早前慷慨捐咗三百萬元，資助興建喺沙田嘅鄉議局新大樓，鄉議局嘅鄉紳為咗表揚佢多年嚟對新界嘅貢獻，決定為佢鑄造一座銅像，鑄造價五十一萬，件事本來係一件美事，不過到今日可以豎立起嚟，都唔係咁順利。開初有鄉紳議論紛紛，話鑄造半身銅像似紀念先人，於是銅像由半身變全身，後來又有意見，話個銅像放喺地面嗰層嘅兩條自動電梯中間，好似把鉸剪咁剪落發叔銅像度，唔多吉利。依家銅像造好嘞，又點呢？
個銅像已經靜雞雞安置咗喺新大樓一樓電梯旁邊嘅空地，本來用嚟遮住個銅像嘅布都拎走咗，個像終於都得見天日，唔知係咪因為要配合趕喺鄉議局今個月十九日舉行嘅就職典禮前曝光呢？
記者所見，發叔個銅像着住套西裝加皮鞋，蹺埋雙腳坐喺張藤椅上，確係幾有威嚴，不過就唔多似真人。似邊個？原來係似影星狄龍呀。