中環出更：何綺蓮至愛David Yurman藍寶石
雖然鑽石係女士至愛，但唔少女士一樣鍾情色彩繽紛嘅寶石，用來襯裙同晚裝一流。卓妮尋日喺香港南區工商業聯合總會同傳媒嘅聚會上，就見到該會副主席何綺蓮（Elaine）戴住美國著名首飾品牌David Yurman嘅藍寶石戒指，幾十粒閃令令嘅鑽石圍住成隻鵪鶉蛋咁大嘅藍寶石，好鬼搶眼。
Elaine話，唔少荷里活女星都好鍾意David Yurman，因為佢啲產品全部用天然寶石，而且每粒寶石嘅顏色同切割面都係獨一無二，賣咗一粒隨時要等好耐先會返貨，喺香港就只有機場同中環ifc二期先有得賣。但因為呢個品牌款式比較西化，香港人未必個個鍾意喎。
總會主席廖漢輝、副主席余鵬春、劉嘉華及施忠民都有出席飯局，佢哋話該會未來會主力搞長者同青少年服務，好似體檢及小型運動會等，而佢哋每兩月一次嘅例會就會邀請各行各業嘅嘉賓主講各項社會時事議題，藉此聯繫工商界人士。
卓妮