政情：嫻姐懶理泛民唇槍舌劍
工聯會「票后」陳婉嫻參加嚟緊十一月區議會選舉幾成事實，佢尋日專程落到黃大仙大成街市同街坊見面，陪同嫻姐嘅，仲有盛傳會讓位畀嫻姐參選嘅工聯會黃大仙區議員林文輝，所以嫻姐落邊區選真係呼之欲出。現場所見，嫻姐甚受街坊歡迎，雖然長者們腳步蹣跚，但都要同嫻姐握握手，認真勁。
不過咁，嫻姐唔係冇挑戰㗎，人稱「維園阿哥」嘅人民力量任亮憲同民主黨尋日都話要挑戰嫻姐。任亮憲話，自己正喺九龍東工作，講明要揀重量級人物挑戰。問到佢有乜優勢，佢講到好白話自己年輕啲，希望嫻姐咪咁辛苦，要照顧身體喎，仲話如果有幸選贏嘅話，就唔再選立法會，專心服務街坊。
民主黨立法會議員李永達亦話，希望嫻姐快快表態，唔好扭扭擰擰，因為白鴿黨都有好多人想挑戰嫻姐。對手接二連三放話，嫻姐一笑置之，話人哋鍾意點講就點講，佢冇所謂喎，仲話如果對方有興趣為基層工作，歡迎大家一齊搞添。未報名就唇槍舌劍，睇嚟嫻姐決定咗落邊區後，選情一定好精彩啫！